«Ливерпуль» бош мураббийи Андони Ираола 2026/2027 йилги мавсум Чемпионлар лигаси умумий босқичи қуръаси якунлари ҳақида фикр билдирди.

«Бу қизиқарли ва мураккаб қуръа бўлди, аммо ҳар қандай ҳолатда ҳам кучли рақибларга қарши ўйнашимизни олдиндан билардик. Айнан шундай бўлди.

Чемпионлар лигасининг кучи ҳам шунда, шунинг учун ушбу турнирда иштирок этиш жиддий синов ҳисобланади. Бу ўйинларнинг ҳар бири ўзига хос тарзда мураккаб бўлади. Шунинг учун биз уларга имкон қадар пухта тайёргарлик кўришимиз ва майдонда бор кучимизни беришимиз керак.

Биз тайёр туришимиз муҳим, аммо бунга қадар Премьер-лигада иккита муҳим ўйин бизни кутмоқда. Ҳозир бутун эътиборимиз шу учрашувларга қаратилган, шундан сўнг Чемпионлар лигасига диққатимизни кўчирамиз.

Аммо бу чақириқни албатта интиқлик билан кутяпмиз. Мухлисларимиз учун ҳам бу жуда қизиқ: бизни “Энфилд”даги Европа кечалари, шунингдек, Италия, Бельгия, Австрия ва Туркиядаги стадионларга сафарлар кутмоқда.

Бу ерга келганимдаёқ Чемпионлар лигаси “Ливерпуль” учун қанчалик алоҳида аҳамиятга эга эканини ва клуб тарихида қандай муҳим ўрин тутишини дарҳол англадим. Шунинг учун мен ва мураббийлар штаби учун бу турнирда жамоа билан ишлаш катта шараф бўлади», — дея Ираоланинг сўзларини клуб расмий сайти келтирмоқда.

«Ливерпуль» Чемпионлар лигаси 2026/2027 йилги мавсуми умумий босқичида «Атлетико Мадрид», «Порту», «Вильярреал», «Ланс», «Интер», «Брюгге», «Фенербахче» ва ЛАСКка қарши ўйнайди.