Turkiyaning «Trabzonspor» klubi bosh murabbiy Fatih Tekkening iste’fosini qabul qilmadi. 48 yoshli mutaxassis Yevropa Ligasi saralash bosqichidan chiqib ketilganidan so‘ng jamoani tark etmoqchi bo‘lgan.
Turkiya klubi matbuot xizmati xabar berishicha, Tekke «Trabzonspor» Yevropa Ligasining umumiy bosqichiga yo‘llanma ololmaganidan keyin iste’foga chiqishini ma’lum qilgan.
Hal qiluvchi saralash bosqichida turkiyaliklar ikki o‘yin natijasiga ko‘ra Vengriyaning «Ferensvarosh» klubiga mag‘lub bo‘ldi.
Biroq «Trabzonspor» rahbariyati Tekkening iste’fosini qabul qilmadi. Murabbiy jamoani Turkiya chempionatining bo‘lajak uchrashuvlariga tayyorlashda davom etadi.
Eslatib o‘tamiz, Turkiya chempionatining dastlabki ikki turida Fatih Tekke boshchiligidagi «Trabzonspor» 4 ochko jamg‘argan.
