Туркиянинг «Трабзонспор» клуби бош мураббий Фатиҳ Теккенинг истеъфосини қабул қилмади. 48 ёшли мутахассис Европа Лигаси саралаш босқичидан чиқиб кетилганидан сўнг жамоани тарк этмоқчи бўлган.
Туркия клуби матбуот хизмати хабар беришича, Текке «Трабзонспор» Европа Лигасининг умумий босқичига йўлланма ололмаганидан кейин истеъфога чиқишини маълум қилган.
Ҳал қилувчи саралаш босқичида туркияликлар икки ўйин натижасига кўра Венгриянинг «Ференцварош» клубига мағлуб бўлди.
Бироқ «Трабзонспор» раҳбарияти Теккенинг истеъфосини қабул қилмади. Мураббий жамоани Туркия чемпионатининг бўлажак учрашувларига тайёрлашда давом этади.
Эслатиб ўтамиз, Туркия чемпионатининг дастлабки икки турида Фатиҳ Текке бошчилигидаги «Трабзонспор» 4 очко жамғарган.
