«Manchester Siti» hujumchisi Erling Xoland Angliya Premyer-ligasining 2-turida «Kristal Pelas» ustidan qozonilgan 4:1 hisobidagi g‘alabadan keyin o‘z fikrlarini bildirdi.

«Mavsumoldi tayyorgarligi juda qisqa bo‘ldi. Sherki hali besh hafta oldin Jahon chempionatida o‘ynayotgan edi. O‘yindan o‘yinga optimal holatimizga qaytib boramiz, buning uchun yana bir nechta uchrashuv o‘tkazishimiz kerak.

Bugun «Siti» yaxshi o‘ynadi. Bizda yangi murabbiy bor, ammo avval ham birga o‘ynaganmiz. Bundan tashqari, tarkibga bir nechta yangi futbolchi qo‘shildi. Nima qilishimiz kerakligini bilamiz va tizimga ishonishimiz lozim.

Fil Foden? Biz birga o‘ynashda davom etishimiz, qayerda eng samarali ekanimizni va maydonda qanday hamkorlik qilishimiz kerakligini tushunib olishimiz zarur. Jamoamizda juda ko‘p kuchli futbolchilar bor va har biri uchun munosib o‘rin topishimiz kerak.

Fil ishlashda davom etishi lozim, chunki uning qanchalik kuchli futbolchi ekanini bilamiz. Eng muhimi — buni haftadan haftaga maydonda ko‘rsatib borish. Bu barchamiz uchun oldinga tashlangan to‘g‘ri qadam. Endi bu muvaffaqiyatni davom ettirishimiz kerak», — dedi Xoland BBC'ga.

«Manchester Siti» mavsum boshidagi ikkinchi g‘alabasini qo‘lga kiritib, APL turnir jadvalida birinchi o‘ringa ko‘tarildi. «Kristal Pelas» esa ketma-ket ikkinchi mag‘lubiyatini qabul qildi va jadvalning so‘nggi pog‘onasida qoldi.

Keyingi turda «Manchester Siti» o‘z maydonida «Koventri»ni qabul qiladi. «Kristal Pelas» esa safarda «Fulxem»ga qarshi maydonga tushadi. Har ikki uchrashuv 5 sentyabr kuni bo‘lib o‘tadi.