«Lill» yarim himoyachisi Nabil Bentaleb Fransiya chempionatining 2-turida «PSJ» bilan 2:2 hisobida yakunlangan uchrashuvdan keyin o‘z fikrlarini bildirdi.

Dastlab bosh hakam ikkinchi bo‘limga 3 daqiqa qo‘shib bergan edi, ammo o‘yin amalda 6 daqiqaga cho‘zildi. «PSJ» 91 va 95-daqiqalarda gol urib, mag‘lubiyatdan qutulib qoldi.

«Bugun biz yaxshiroq natijaga loyiq edik. Qo‘limizdan kelgan barcha ishni qildik, xarakter ko‘rsatdik. Natijani ushlab turayotgan edik, ammo hammasini mayda detallar hal qildi.

Hakam ularning golidan oldin biz bir daqiqa vaqt yo‘qotganimizni aytdi. Bu masalaning tafsilotlariga kirishmaymiz, chunki bunday gaplar qanday oqibatlarga olib kelishi mumkinligini bilamiz», — dedi Bentaleb RMC Sport'ga.

Futbolchining aytishicha, hakam «Lill» darvozaboni jarohat olgan vaziyatdan keyin jamoa futbolchilarini ogohlantirgan.

«U darvozabonga yerda yotishda davom etsa, yana bir daqiqa qo‘shib berishini aytdi», — deya qo‘shimcha qildi Bentaleb.

Ushbu uchrashuvdan keyin «PSJ» 2 ochko bilan Liga 1 turnir jadvalida 6-o‘rinni egallab turibdi. «Lill» esa 4 ochko bilan peshqadamlik qilmoqda.