«Лилль» ярим ҳимоячиси Набил Бенталеб Франция чемпионатининг 2-турида «ПСЖ» билан 2:2 ҳисобида якунланган учрашувдан кейин ўз фикрларини билдирди.

Дастлаб бош ҳакам иккинчи бўлимга 3 дақиқа қўшиб берган эди, аммо ўйин амалда 6 дақиқага чўзилди. «ПСЖ» 91 ва 95-дақиқаларда гол уриб, мағлубиятдан қутулиб қолди.

«Бугун биз яхшироқ натижага лойиқ эдик. Қўлимиздан келган барча ишни қилдик, характер кўрсатдик. Натижани ушлаб тураётган эдик, аммо ҳаммасини майда деталлар ҳал қилди.

Ҳакам уларнинг голидан олдин биз бир дақиқа вақт йўқотганимизни айтди. Бу масаланинг тафсилотларига киришмаймиз, чунки бундай гаплар қандай оқибатларга олиб келиши мумкинлигини биламиз», — деди Бенталеб RMC Sport'га.

Футболчининг айтишича, ҳакам «Лилль» дарвозабони жароҳат олган вазиятдан кейин жамоа футболчиларини огоҳлантирган.

«У дарвозабонга ерда ётишда давом этса, яна бир дақиқа қўшиб беришини айтди», — дея қўшимча қилди Бенталеб.

Ушбу учрашувдан кейин «ПСЖ» 2 очко билан Лига 1 турнир жадвалида 6-ўринни эгаллаб турибди. «Лилль» эса 4 очко билан пешқадамлик қилмоқда.