"Liverpul" va "Milan" klublarining sobiq yarim himoyachisi Suso futbolchilik faoliyatini yakunlashga qaror qildi. Bu haqda "Kadis" matbuot xizmati ma’lum qildi.

32 yoshli ispaniyalik futbolchi 2025 yilda qo‘shilgan "Kadis" klubining elchisi sifatida faoliyatini davom ettiradi.

O‘tgan mavsumda Suso Ispaniya Segundasida 27 ta uchrashuvda maydonga tushib, 1 ta gol urdi va 3 ta golli uzatmani amalga oshirdi. Shuningdek, u 4 ta sariq kartochka olgan.

Faoliyati davomida Suso "Sevilya", "Jenoa" va "Almeriya" klublarida ham to‘p surgan.

Ispaniya milliy terma jamoasi safida esa 5 ta uchrashuv o‘tkazgan va samarali harakat qayd etmagan.