«Barselona» bosh murabbiyi Hansi Flik «Atletiko» hujumchisi Xulian Alvaresning kataloniyaliklar safiga ehtimoliy transferi haqidagi savolga hazilomuz munosabat bildirdi.
«Mendan Xulian Alvares haqida so‘ramoqchimisiz?» — deya kulib jurnalistga murojaat qildi Flik.
Jurnalist nemis mutaxassisi argentinalik futbolchi haqidagi savolni eshitishni xohlaydimi, deb so‘raganida, Flik shunday javob qaytardi:
«Yo‘q, kerak emas. Chunki baribir avvalgidek javob olasiz», — deya murabbiyning so‘zlarini keltiradi The Touchline.
Flik so‘nggi vaqtlarda Alvares haqida batafsil fikr bildirishdan bir necha bor bosh tortib, boshqa klub futbolchilarini muhokama qilishni istamasligini ta’kidlab kelmoqda.
Shu bilan birga, «Barselona» 26 yoshli hujumchiga qiziqishini saqlab qolmoqda. «Atletiko» esa Alvaresni kataloniyaliklarga sotish niyatida emas.
