«Arsenal» braziliyalik vinger Gabriel Martinellini Saudiya Arabistonining «Al-Hilol» klubiga 55,7 million funt sterling evaziga sotishga kelishdi.

Bu London klubi tarixidagi eng qimmat transfer bo‘ladi. Martinelli yangi jamoasiga o‘tishdan oldin tibbiy ko‘rikdan o‘tishi uchun ruxsat olgan.

Shuningdek, «Arsenal» Gabriel Jezusning «Barselona»ga o‘tishi bo‘yicha ham prinsipial kelishuvga erishdi. Ispaniya klubi 29 yoshli hujumchi uchun 8,6 million funt sterling to‘laydi.

Martinelli 2019 yildan buyon «Arsenal» safida to‘p tepib kelayotgan edi. U jamoa tarkibida 278 ta uchrashuv o‘tkazib, 62 ta gol urgan. O‘tgan mavsumda esa «Arsenal» bilan Angliya chempionligini qo‘lga kiritdi.

Gabriel Jezus esa 2022 yilda «Manchester Siti»dan «Arsenal»ga o‘tgan. Braziliyalik futbolchi London klubi safida 132 ta uchrashuvda 32 ta gol urgan.