«Monako» yarim himoyachisi Aleksandr Golovinni «Zenit»ga 20 million yevrodan kamroq summaga sotishi mumkin. Bu haqda jurnalist Anar Ibragimov xabar berdi.

Qayd etilishicha, fransuz klubi rossiyalik yarim himoyachining ehtimoliy transferiga to‘sqinlik qilmaydi. «Monako» futbolchining sotuvidan daromad olish va uning yillik 3,6 million yevrolik maoshidan xalos bo‘lishni istamoqda.

«Zenit» bosh murabbiyi Sergey Semak va peterburglik klub boshqaruvi raisi Konstantin Ziryanov Golovin nomzodini qo‘llab-quvvatlamoqda hamda o‘z pozisiyalarini klub rahbariyatiga yetkazgan.

Avvalroq «Zenit» Golovin uchun Luis Enrike va Ninoni qo‘shimcha pul bilan taklif qilgani haqida xabar berilgan edi. Biroq «Monako» har ikki variantni ham rad etgan.