«Galatasaroy»ni tark etganidan so‘ng Mauro Ikardi transfer bozoridagi eng talabgir erkin agentlardan biriga aylandi.
Argentinalik hujumchining Italiya A Seriyasiga qaytishi mumkinligi haqida xabarlar tarqalmoqda. Xususan, «Lasio» uni Rimga olib kelish bo‘yicha jiddiy harakat qilmoqda.
Futbolchining agenti Letterio Pino ham «Lasio»ning aniq qiziqishini tasdiqladi.
«Mauro o‘zi uchun eng yaxshi loyihani baholamoqda. Bu iqtisodiy emas, balki hayot tarzi bilan bog‘liq tanlov bo‘ladi.
Mauro go‘zal shaharda yashashni va ajoyib joyda futbol o‘ynashni istaydi.
«Lasio» uni juda faol ravishda o‘z safiga jalb qilishga harakat qilmoqda. Bu biz ko‘rib chiqayotgan variantlardan biri», — dedi futbolchining vakili.
Ayni paytda Ikardi erkin agent maqomida bo‘lib, keyingi klubini tanlash jarayonida.
