«Real Sosyedad» sport direktori Erik Bretos Arsen Zaxaryandan natija ko‘rsatishni talab qildi.

Rossiyalik futbolchi ispan klubidagi to‘rtinchi mavsumini o‘tkazmoqda. U La Ligada 50 ta uchrashuvda maydonga tushib, 2 ta gol urgan va 2 ta golli uzatma amalga oshirgan.

«Zaxaryanning rivojlanishi barqaror kechmadi. Birinchi mavsum ijobiy o‘tdi, u o‘z imkoniyatlarini namoyish qildi. Keyin esa jarohatlar bilan bog‘liq muammolar yuzaga keldi. O‘tgan mavsum esa barcha uchun katta ko‘ngilsizlik bo‘ldi.

Mavsum yakunida u bilan suhbatlashib, juda sabrli bo‘lganimizni, ammo endi natija ko‘rsatish vaqti kelganini aytdim. Sabrning ham chegarasi bor», — dedi Bretos.