Toshkentdagi “Humo arena”da futzal bo‘yicha 2026 yilgi O‘zbekiston Superkubogi bahsi o‘tkazildi. Bellashuv “SQB” ham “BMB” jamoalari o‘rtasida kechdi. Qiziqarli o‘tgan o‘yinning asosiy vaqtida 3:3 hisobi qayd etildi. Penaltilar seriyasida esa “SQB” 4:2 hisobida g‘alaba qozonib, o‘z tarixida ilk bor O‘zbekiston Superkubogi sohibiga aylandi.
2-daqiqada “SQB” futzalchisi Davlat Ibragimov hisobni ochdi. 27-daqiqaga kelib, Timur Salimov oradagi farqni ikkitaga yetkazdi. 31-daqiqada himoyachilarning xatosidan unumli foydalangan Jan Aldemiro hisobni qisqartirdi. 32-daqiqada Hebbert Oliveyra Bolt yana “SQB”ning ustunligini mustahkamladi. 33-daqiqada Jan Aldemiro dubl qayd etgan bo‘lsa, 35-daqiqada “BMB” futzalchisi Vitor muvozanatni tikladi.
Penaltilar seriyasida esa “SQB” darvozaboni Shavkat Ibragimov ishonchli harakat qilib, ikkita zarbani bartaraf etishga muvaffaq bo‘ldi. “SQB” futzalchilari esa aniq harakat qilib, g‘alabani ilib ketishdi.
Mazkur bellashuvga jahon futbolining mashhur afsonalari faxriy mehmon sifatida taklif etilgan. Xususan, braziliyalik darvozabon Julio Sezar, italiyalik sobiq futbolchilar Marko Materassi va Kristian Zakkardo, shuningdek, Jerom Boateng (Germaniya), Migel Salgado (Ispaniya), Esteban Kambiasso (Argentina), Rikardu Kuarejma (Portugaliya), Uesli Sneyder (Niderlandiya), Oskar (Braziliya), Kevin Kuranyi (Germaniya) va Vinchenso Yakvinta (Italiya) Superkubok uchrashuvini bevosita arenadan kuzatib bordi va taqdirlash marosimida ishtirok etdi.
O‘zbekiston Superkubogi
“BMB” — “SQB” 3:3
Penatilar seriyasi — 2:4
Gollar: 0:1 — Davlat Ibragimov (2), 0:2 — Timur Salimov (27), 1:2 — Jan Aldemiro (31), 1:3 — Hebbert Oliveyra Bolt (32), 2:3 — Jan Aldemiro (33), 3:3 — Vitor (35)
