"Borussiya Dortmund"ning yangi futbolchisi Yannis Konstantelias shanba kuni "Gamburg"ga qarshi 2:0 hisobidagi g‘alabali o‘yinda old xochsimon bog‘lamidan jiddiy jarohat oldi. Shundan so‘ng dortmundliklar transfer oynasining so‘nggi pallasida harakatga tushib, "Arsenal"ning yosh futbolchisi Itan Nvanerini ijaraga oldi.

Sky Sport transfer insayderi Fabrisio Romanoning ma’lumotini tasdiqladi. Unga ko‘ra, "Arsenal" Nvanerining ijara shartnomasiga futbolchini 1 yanvardan boshlab muddatidan oldin qaytarib olish huquqini beruvchi maxsus band kiritgan.

Sky Sport xabariga ko‘ra, muzokaralar vaqtida bu shart "Arsenal" uchun muhokama qilinmaydigan masala bo‘lgan. Bunga London klubining hujum chizig‘ida futbolchilar soni cheklangani ham sabab bo‘lgan.

"Borussiya" esa vaqt juda qisqa bo‘lgani uchun ushbu shartga rozi bo‘lgan.

Shu bilan birga, manbaga ko‘ra, mazkur ssenariyda dortmundliklar moliyaviy jihatdan himoyalangan. Agar "Arsenal" Nvanerini yanvarda qaytarib olish huquqidan foydalansa, "Borussiya" ijara uchun hech qanday to‘lov qilmaydi.

Bundan tashqari, ushbu band aniq muddat bilan cheklangan. Sky Sport ma’lumotiga ko‘ra, agar "Arsenal" Nvanerini qaytarib olmoqchi bo‘lsa, bu haqda "Borussiya"ni oldindan xabardor qilishi shart.

Bu esa Dortmund klubiga qishki transfer oynasida vaziyatga munosib javob berish va o‘rinbosar futbolchi topish uchun yetarli vaqt beradi.