Bugun poytaxtimizda sportsevarlar va yugurish ishqibozlarini bir maydonga jamlagan II “Tashkent International Half Marathon” xalqaro yarim marafoniga start berildi. Markaziy ko‘chalar bo‘ylab tashkil etilayotgan marafonda mahalliy va xorijlik ishtirokchilar 5 kilometrlik ommaviy yugurish hamda 21,0975 kilometrlik yarim marafon masofalarida kuch sinashmoqda.
Poytaxtimizda II “Tashkent International Half Marathon” xalqaro yarim marafoni doirasida soat 06:00 da 5 kilometrlik ommaviy yugurish, 06:30 da esa 21,0975 kilometr masofaga yarim marafon bahslariga start berildi. G‘olib va sovrindorlarni taqdirlash marosimi soat 10:00 da o‘tkaziladi.
21,0975 kilometrlik yarim marafonning sovrin jamg‘armasi erkaklar va ayollar o‘rtasida alohida hisoblanadi. Har bir yo‘nalishda birinchi o‘rin sohibi 15 million, ikkinchi o‘rin 12 million, uchinchi o‘rin 10 million, to‘rtinchi o‘rin 6 million, beshinchi o‘rin 4 million va oltinchi o‘rin 3 million so‘m pul mukofoti bilan taqdirlanadi.
