Turkiyaning “Trabzonspor” klubi yozgi transferlar oynasining so‘nggi kunigacha o‘zbekistonlik hujumchi Eldor Shomurodovni o‘z safiga qo‘shib olishga jiddiy harakat qilgani ma’lum bo‘ldi.

Trabzonliklar hujumchi Felipe Augusto o‘rniga 18 yoshli Rene Mitongoni sotib olgan. Biroq klub yosh futbolchiga yetarli o‘yin amaliyoti berish uchun uni ijaraga jo‘natishni, hujum markaziga esa tajribaliroq forvard olib kelishni maqsad qilgan. Jamoa bosh murabbiyi Fatih Tekkega aynan O‘zbekiston milliy terma jamoasi sardorining o‘yin uslubi ma’qul kelgan va uni transfer ro‘yxatidagi asosiy nomzodlardan biri sifatida ko‘rsatgan.

Qayd etilishicha, “Trabzonspor” rahbariyati 31 yoshli hujumchining transferi yuzasidan “Bashakshehir” bilan dastlabki aloqalarni o‘rnatib, narx-navo bo‘yicha ma’lumot olgan. Trabzonliklar transfer oynasi yopilguniga qadar hujum chizig‘ini aynan Shomurodov bilan kuchaytirishni niyat qilgan bo‘lsa-da, yakunda kelishuv amalga oshmay qolgan. Fanatik nashrining ma’lum qilishicha, “Bashakshehir” O‘zbekiston milliy terma jamoasi sardori uchun 13–15 million yevro atrofida mablag‘ talab qilgan.

Aslida, Konferensiyalar Ligasining saralash bosqichidan o‘ta olmagan “Bashakshehir” ba’zi yulduzlarini sotishga qarshi emasdi. Jamoaning hujum chizig‘ida ham raqobat yuqori: Selke, Nunu da Koshta, Bertug‘ Yildirim, Umut Bozok hamda Shomurodov mavjud. Biroq Istanbul klubining yuqori narx belgilagani hamda “Trabzonspor”dagi legionerlar limiti bilan bog‘liq vaziyat sababli, muddat tugaguniga qadar bu transferni yakunlashning imkoni bo‘lmagan.

Ma’lumot o‘rnida, Istanbul klubi Shomurodov transferi uchun jami 5,8 million yevro xarajat qilgan edi. Jamoa 2025-yili hujumchini “Roma”dan 3 million yevroga ijaraga olgan va yozda shartnomada ko‘rsatilgan 2,8 million yevrolik to‘liq sotib olish huquqidan foydalangandi.