Туркиянинг “Трабзонспор” клуби ёзги трансферлар ойнасининг сўнгги кунигача ўзбекистонлик ҳужумчи Элдор Шомуродовни ўз сафига қўшиб олишга жиддий ҳаракат қилгани маълум бўлди.

Трабзонликлар ҳужумчи Фелипе Аугусто ўрнига 18 ёшли Рене Митонгони сотиб олган. Бироқ клуб ёш футболчига етарли ўйин амалиёти бериш учун уни ижарага жўнатишни, ҳужум марказига эса тажрибалироқ форвард олиб келишни мақсад қилган. Жамоа бош мураббийи Фатиҳ Теккега айнан Ўзбекистон миллий терма жамоаси сардорининг ўйин услуби маъқул келган ва уни трансфер рўйхатидаги асосий номзодлардан бири сифатида кўрсатган.

Қайд этилишича, “Трабзонспор” раҳбарияти 31 ёшли ҳужумчининг трансфери юзасидан “Башакшеҳир” билан дастлабки алоқаларни ўрнатиб, нарх-наво бўйича маълумот олган. Трабзонликлар трансфер ойнаси ёпилгунига қадар ҳужум чизиғини айнан Шомуродов билан кучайтиришни ният қилган бўлса-да, якунда келишув амалга ошмай қолган. Фанатик нашрининг маълум қилишича, “Башакшеҳир” Ўзбекистон миллий терма жамоаси сардори учун 13–15 миллион евро атрофида маблағ талаб қилган.

Аслида, Конференциялар Лигасининг саралаш босқичидан ўта олмаган “Башакшеҳир” баъзи юлдузларини сотишга қарши эмасди. Жамоанинг ҳужум чизиғида ҳам рақобат юқори: Селке, Нуну да Кошта, Бертуғ Йилдирим, Умут Бозок ҳамда Шомуродов мавжуд. Бироқ Истанбул клубининг юқори нарх белгилагани ҳамда “Трабзонспор”даги легионерлар лимити билан боғлиқ вазият сабабли, муддат тугагунига қадар бу трансферни якунлашнинг имкони бўлмаган.

Маълумот ўрнида, Истанбул клуби Шомуродов трансфери учун жами 5,8 миллион евро харажат қилган эди. Жамоа 2025-йили ҳужумчини “Рома”дан 3 миллион еврога ижарага олган ва ёзда шартномада кўрсатилган 2,8 миллион евролик тўлиқ сотиб олиш ҳуқуқидан фойдаланганди.