«Chelsi» Enso Fernandes «Manchester Siti»ga o‘tganidan so‘ng uning o‘rnini bosish uchun bir nechta variantni ko‘rib chiqqan.

London klubi Manu Kone va Lamin Kamara nomzodlarini o‘rgangan, ammo transfer oynasi yopilguniga qadar bu kelishuvlarni amalga oshira olmagan.

Shundan so‘ng «Chelsi» erkin agent maqomidagi bir qator futbolchilarga e’tibor qaratgan. Ular orasida «Bavariya» va «Pari Sen-Jermen»ning sobiq yarim himoyachisi Renatu Sanshesh ham bo‘lgan.

Foot Mercato ma’lumotiga ko‘ra, 29 yoshli portugaliyalik futbolchi yuqori darajadagi katta tajribasi va «PSJ»ni tark etgach, darhol yangi klubga qo‘shilish imkoniyati borligi sabab «Chelsi» uchun jozibador variant sifatida qaralgan.

Biroq yakunda London klubi Sanshesh transferini amalga oshirmaslikka qaror qildi va jamoadagi mavjud yarim himoyachilarga ishonch bildirishni ma’qul ko‘rdi.

Bu qaror «Chelsi»ning yangi bosh murabbiyi Xabi Alonso fikrlariga ham mos keladi. U yaqinda jamoada mavsumni munosib o‘tkazish uchun yetarli sifat va raqobat borligini ta’kidlagan edi.