«Real» bosh murabbiyi Joze Mourinyo «Betis»ga qarshi 0:1 hisobida boy berilgan uchrashuvdagi hakamlik borasida fikr bildirdi. Portugaliyalik mutaxassis Kilian Mbappe amalga oshirgan penaltidan keyin vaziyat nima uchun qayta ko‘rib chiqilmaganini tushunmaganini aytdi.

«Avvalo shuni aytaman: biz «Betis»ga yaratgan vaziyatlarimizni golga aylantira olmaganimiz uchun mag‘lub bo‘ldik. Gap shu.

Ammo nega penalti qayta ko‘rib chiqilmadi? VAR qoidani bilmaydimi yoki vaziyatni qayta ko‘rishni xohlamadimi? Men hakamlar bu savolga javob berishini istardim.

Agar VAR qoidani bilmasa, u holda ishidan ketishi kerak. Agar vaziyatni qayta ko‘rishni xohlamagan bo‘lsa, bu yanada yomon. Agar qoidani bilmagan bo‘lsa, nega bosh hakamni chaqirmadi? Bularning barchasi biroz g‘alati», — dedi Mourinyu.

Mutaxassis, shu bilan birga, jamoasining mag‘lubiyatini mazkur epizod bilan bog‘lamasligini ta’kidladi.

«Men vaziyatga ijobiy yondashib, VAR futbolchining jarima maydoni ichida bo‘lganini payqamagan, deb o‘ylashni afzal ko‘raman. Shuni ham aniq aytmoqchiman: biz aynan shu epizod tufayli mag‘lub bo‘lmadik. Chunki penaltini qayta tepganimizda ham gol urmasligimiz mumkin edi.

Ammo «Real» murabbiyi va futbol odami sifatida nega bu vaziyat qayta ko‘rib chiqilmaganini bilmoqchiman. Hakamlar bu savolga javob berishini istayman», — qo‘shimcha qildi u.

Mourinyu Vinisius Juniorga ko‘rsatilgan sariq kartochka haqida ham savol qoldirdi.

«O‘sha o‘yinda yana bir epizod bor edi va u penaltiga umuman bog‘liq emas. Nega «Real» sardori sariq kartochka oldi? Vinisius hakam tomon yo‘l oldi va hali uning oldiga yetib bormasidan kartochkani ko‘rdi.

Bizga sardor hakamga xushmuomalalik bilan murojaat qilib, izoh so‘rash huquqiga ega, deb aytishadi. Men bu vaziyatga ham oydinlik kiritishni istayman», — dedi Mourinyu.

Hozirda «Real» Chempionlar ligasi doirasida o‘z maydonida «Inter»ga qarshi o‘tadigan uchrashuvga tayyorgarlik ko‘rmoqda.