Maurisio Pochettino AQSH milliy jamoasi bilan shartnomasini uzaytirgach, mamlakatni jahon futbolining yetakchi davlatlaridan biriga aylantirishni maqsad qilganini aytdi.

Argentinalik mutaxassisning AQSH futbolidagi vakolatlari ham kengaytirildi. Endi u yosh futbolchilarni rivojlantirish, murabbiylar tayyorlash va professional ligalar o‘rtasidagi hamkorlik masalalari bilan ham shug‘ullanadi. Biroq Pochettinoning rejalari 2030 yilgi jahon chempionati bilan cheklanmaydi.

«Bu — AQSHning kelajagi. Jahon chempionatida yaxshi natija ko‘rsatishga va muxlislar bilan birgalikda o‘ziga xos muhit yaratishga harakat qilamiz.

Hozir federasiya yaratmoqchi bo‘lgan merosning bir qismiga aylanishimiz kerak. Asosiy maqsad — AQSHni futboldagi eng qudratli mamlakatlardan biriga aylantirish. Bu — orzu», — dedi Pochettino.

2028 yili Los-Anjelesda o‘tadigan Olimpiada o‘yinlari ham murabbiyning asosiy maqsadlaridan biri. Pochettino AQSH jamoasi o‘z maydonida oltin medal uchun kurashishi kerak deb hisoblaydi. Shuningdek, u yosh futbolchilarga mamlakat sharafini himoya qilish uchun ko‘proq imkoniyat berish lozimligini ta’kidladi.

«Federasiyamiz va mamlakatimizning maqsadlaridan biri Olimpiada oltin medali uchun asosiy da’vogar bo‘lishdir», — dedi murabbiy.

Pochettino AQSHda yosh futbolchilarni tarbiyalashga bo‘lgan munosabatni ham tanqid qildi. Xususan, u klublarning o‘smir futbolchilarni milliy jamoa yig‘inlariga qo‘yib yubormasligiga e’tiroz bildirdi.

«Agar 17 yoshda bo‘lsang va dam olishing kerak bo‘lsa? Voy-voy-voy, demak, senda katta muammo bor.

17 yoki 18 yoshli futbolchiga 30 yoshli o‘yinchi kabi munosabatda bo‘lish mumkin emas. Ba’zan biz 18 yoshli futbolchilarni 28 yoki 30 yoshli o‘yinchilardek qabul qilamiz», — dedi Pochettino.

Murabbiyning fikricha, bunday qarashni o‘zgartirish AQSHda kuchli futbol madaniyatini shakllantirish uchun muhim ahamiyatga ega.