Professional boksning super o‘rta vazn toifasida WBA yo‘nalishi bo‘yicha asosiy da’vogar hisoblangan Meliqo‘ziyev tashkilotning amaldagi chempioni, meksikalik Xayme Munguyaga qarshi ringga chiqish istagini bildirdi.

“Bek Bulli” avvalroq bu haqda ijtimoiy tarmoqlardagi sahifasi orqali ma’lum qilgan edi. O‘zbekistonlik bokschi Munguyaga 31-oktyabr kuni bo‘lib o‘tadigan Mexico vs The World professional boks oqshomi doirasida jang o‘tkazishni taklif qildi.

Mazkur boks oqshomining markaziy jangi Saul Alvares va Kristian Mbilli o‘rtasida bo‘lib o‘tishi rejalashtirilgan.

Ma’lumot uchun, Bektemir Meliqo‘ziyev ayni paytda WBA reytingida birinchi o‘rinni egallab turibdi. O‘zbekistonlik bokschi so‘nggi jangida ganalik Sena Agbekoni texnik nokaut evaziga mag‘lub etib, WBA qit’alararo chempionlik kamarini muvaffaqiyatli himoya qilgan edi.

Mazkur g‘alaba Meliqo‘ziyevning professional ringdagi 17-g‘alabasi bo‘ldi. Uning hisobida birgina mag‘lubiyat mavjud. Supero‘rta vazn toifasining WBA yo‘nalishidagi amaldagi chempioni Xayme Munguya hisoblanadi.

30 yoshli o‘zbekistonlik charm qo‘lqop ustasi ayni paytda professional boks bo‘yicha sobiq Jahon chempioni Oskar de la Hoyaga tegishli bo‘lgan Golden Boy promouterlik kompaniyasi bilan hamkorlik qilib kelmoqda.