«Real» darvozaboni Tibo Kurtua Chempionlar ligasida «Inter»ga qarshi o‘yin yakunlari haqida fikr bildirdi. Madridliklar Italiya klubini 2:1 hisobida mag‘lub etdi.
«Biz juda kuchli raqibga qarshi o‘ynadik. «Inter» — Yevropaning eng yaxshi jamoalaridan biri. Bu o‘yin bemalol 4:4 hisobida ham tugashi mumkin edi.
Biz ularning xatolaridan foydalandik, ular esa faqat o‘yin oxiriga yaqin gol ura oldi. Aslida, uchrashuv taqdirini ancha oldin hal qilishimiz mumkin edi», — deya Kurtuaning so‘zlarini Marca keltiradi.
Himoyadagi muammolar haqida gapirar ekan, belgiyalik darvozabon quyidagilarni aytdi:
«Menimcha, ayniqsa yarim himoyachilarimiz qiynaldi. Hujumni davom ettirish uchun aniq imkoniyat yo‘qligini his qilgan paytlarda, ehtimol, to‘pni ortga qaytarib, o‘yin nazoratini yana qo‘lga olish kerak edi.
Uchrashuv juda tartibsiz kechdi va bu biz ishlashimiz kerak bo‘lgan jihatlardan biri».
