«Bavariya» darvozaboni Manuel Noyer jamoasining Chempionlar ligasidagi yangi mavsum uchun imkoniyatlari haqida fikr bildirdi.

Chempionlar ligasi g‘olibligi uchun asosiy da’vogarlar haqida:

«Avvalgi yillarda finalga chiqqan jamoalar yana asosiy da’vogarlar qatorida. «Barselona» ham juda kuchli tarkibga ega. Pley-off bosqichi yaqinlashgan sari favoritlar yanada aniqroq ko‘rina boshlaydi. Barcha jamoalarda o‘sish va pasayish davrlari bo‘ladi, ammo odatdagi kuchli klublar favoritlar safida bo‘lishini kutyapman».

«Bavariya»ga turnirda g‘olib chiqish uchun nima yetishmayotgani haqida:

«Hammasi mayda detallarga bog‘liq. Biz muvaffaqiyatga juda yaqin kelganmiz, jumladan, o‘tgan mavsum «Real» va «PSJ»ga qarshi o‘yinlarda ham. Bizda salohiyat bor, tajriba ham yordam beradi.

Yana shu bosqichlargacha yetib borish istagimiz juda katta. Asosiy maqsadimiz — Chempionlar ligasini yutish. Biz og‘ir mag‘lubiyatlarni boshdan kechirdik, ammo bu bizga qo‘shimcha motivasiya beradi. Chunki kelasi yoz Madridda o‘tadigan finalda o‘ynashni istaymiz».

Madriddagi final uning ehtimol so‘nggi mavsumidagi asosiy maqsadmi, degan savolga Noyer shunday javob berdi:

«Men mavsumni imkoni boricha barcha sovrinlarni qo‘lga kiritish niyatida boshlayapman. Menimcha, jamoamiz bunga qodir. Aynan shuning uchun ham faoliyatimni davom ettirishga qaror qildim.

Bu jamoa, murabbiylar shtabi va bizning kayfiyatimiz bilan barchasiga erishish mumkinligini bilaman. Chempionlar ligasini uchinchi marta yutish men uchun juda katta ahamiyatga ega bo‘lardi. Oldimizda kuchli raqiblar bilan o‘yinlar turganini tushunamiz. Endi yaxshi tayyorgarlik ko‘rib, avvalo musobaqa startiga e’tibor qaratishimiz kerak», — dedi 40 yoshli Noyer matbuot anjumanida.

«Bavariya» Chempionlar ligasi umumiy bosqichi 1-turida o‘z maydonida «Bude-Glimt»ni qabul qiladi.