Marokash futbol federasiyasi rahbari Fauzi Lekja 2030-yilgi Jahon chempionatining hal qiluvchi o‘yini qayerda o‘tkazilishi kerakligini aytdi. Uning ta’kidlashicha, final uchrashuvini hozirda qurilishi davom etayotgan va 115 ming muxlisni sig‘dira oladigan ulkan stadion qabul qiladi.

Lekjaning ma’lum qilishicha, mazkur bahs Kasablanka shahri yaqinidagi Bensliman provinsiyasida bo‘lib o‘tadi:

“JCH—2030 finalini qabul qilishdek sharaf aynan Bensliman provinsiyasiga nasib etadi deb umid qilaman. Shunday ekan, kelgusida hukumat tarkibidan joy oladigan har qanday rahbar oldida faqat bir yo‘l qoladi — ushbu hududni jadal rivojlantirish”, deydi Lekja.

Ma’lumot o‘rnida, Kasablanka shahri yaqinidagi Bensliman provinsiyasida “Hasan II” nomidagi muhtasham arena barpo etilmoqda. 115 ming o‘ringa mo‘ljallangan mazkur ob’ekt qurib bitkazilgach, dunyodagi eng yirik futbol stadioniga aylanadi.

Qizig‘i shundaki, Xalqaro futbol federasiyasi (FIFA) final uchrashuvi aynan qayerda o‘tishini hali rasman tasdiqlaganicha yo‘q. Shuningdek, bu borada Marokashning asosiy raqobatchisi Ispaniya bo‘lib turibdi. Ispaniya futbol federasiyasi final o‘yinini aynan o‘z mamlakatida qabul qilishi kerakligini doimiy ravishda ta’kidlab kelmoqda.

Eslatib o‘tamiz, JCH—2030 bahslarining asosiy qismiga Marokash, Portugaliya va Ispaniya mezbonlik qiladi. Dastlabki mundialning 100 yilligi munosabati bilan musobaqaning uchta o‘yini Janubiy Amerikada — Paragvay, Urugvay va Argentinada bo‘lib o‘tadi.