Saudiya Arabistoni Pro-ligasining 2026/27 yilgi mavsumi 7-turidan o‘rin olgan «Al-Xalij» — «An-Nasr» uchrashuvi yakunlandi. Bahs Dammam shahridagi «Prins Muhammad bin Fahd» stadionida bo‘lib o‘tdi. Uchrashuvni Faysal Al-Balavi boshqardi.

Birinchi bo‘limga qo‘shib berilgan vaqtning 1-daqiqasida yarim himoyachi Omar Maskarel «Al-Xalij»ni hisobda oldinga olib chiqdi.

72-daqiqada esa «An-Nasr» hujumchisi Abdulla Al-Hamdan Inigo Martinesning uzatmasidan so‘ng hisobni tenglashtirdi.

«An-Nasr» hujumchisi Krishtianu Ronaldu uchrashuvni asosiy tarkibda boshladi va 90 daqiqa maydonda harakat qildi.

Ayni paytda «An-Nasr» Saudiya Arabistoni chempionati turnir jadvalida 4-o‘rinni egallab turibdi. Jamoa 7 ta o‘yindan keyin 15 ochko jamg‘argan va peshqadam «Al-Hilol»dan 3 ochko ortda qolmoqda.

«Al-Xalij» esa 7 ochko bilan turnir jadvalining 11-pog‘onasida joylashgan.