«Everton» darvozaboni Jordan Pikford Angliya Premyer-ligasidagi 100-«quruq» o‘yinini o‘tkazdi.
U bu natijaga «Tottenxem»ga qarshi 4-tur bahsida erishdi. Uchrashuv 0:0 hisobida yakunlandi.
Shu tariqa, Pikford Premyer-liga tarixida 100 va undan ortiq o‘yinda gol o‘tkazmagan 19-darvozabonga aylandi.
Bu ko‘rsatkich bo‘yicha rekord hamon Petr Chexga tegishli. Chex «Chelsi» va «Arsenal» safida APLda 202 ta «quruq» o‘yin o‘tkazgan. U yaqin ta’qibchisi Devid Jeymsdan 33 ta o‘yinga oldinda.
Ushbu ro‘yxatga qo‘shilishga yaqin turgan navbatdagi darvozabon — «Nyukasl» vakili Nik Poup. Uning hisobida 80 ta «quruq» o‘yin bor. Biroq so‘nggi vaqtlarda u jamoaning asosiy tarkibida muntazam maydonga tushmayapti.
