“Tottenhem” Angliya Premyer Ligasining 4-turida “Everton” bilan 0:0 hisobida durang o‘ynadi. Shu tariqa “shporlar” klub tarixida ilk bor Angliya chempionatining dastlabki to‘rtta uchrashuvida birorta ham gol ura olmadi. Bu haqda Squawka portal xabar berdi.

“Tottenhem”ning APL joriy mavsumidagi golsiz seriyasiga “Brentford”ga qarshi 0:3 va “Nyukasl Yunayted”ga qarshi 0:2 hisobidagi mag‘lubiyatlar, shuningdek, “Nottingem Forest” va “Everton” bilan 0:0 hisobidagi duranglar kiradi.

Premyer Liga tarixida mavsum boshidagi bundan ham uzunroq golsiz seriya faqat “Kristal Pelas”da kuzatilgan. London klubi 2017/18 yilgi mavsumning dastlabki yetti uchrashuvida gol ura olmagan edi.

Shuningdek, “Tottenhem” uchun bu Angliya futbolining eng yuqori to‘rtta divizionidagi mavsum startida qayd etilgan eng uzoq golsiz seriya hisoblanadi.

Keyingi turda “shporlar” 19 sentyabr kuni o‘z maydonida “Aston Villa”ni qabul qiladi.

“Tottenhem” ayni paytda 2 ochko bilan Angliya Premyer Ligasi turnir jadvalining 17-pog‘onasidan joy olgan.

“Shporlar” o‘tgan mavsum yakunlariga ko‘ra ham APL turnir jadvalida 17-o‘rinni egallagan edi.