“Тоттенҳэм” Англия Премьер Лигасининг 4-турида “Эвертон” билан 0:0 ҳисобида дуранг ўйнади. Шу тариқа “шпорлар” клуб тарихида илк бор Англия чемпионатининг дастлабки тўртта учрашувида бирорта ҳам гол ура олмади. Бу ҳақда Squawka портал хабар берди.

“Тоттенҳэм”нинг АПЛ жорий мавсумидаги голсиз сериясига “Брентфорд”га қарши 0:3 ва “Ньюкасл Юнайтед”га қарши 0:2 ҳисобидаги мағлубиятлар, шунингдек, “Ноттингем Форест” ва “Эвертон” билан 0:0 ҳисобидаги дуранглар киради.

Премьер Лига тарихида мавсум бошидаги бундан ҳам узунроқ голсиз серия фақат “Кристал Пэлас”да кузатилган. Лондон клуби 2017/18 йилги мавсумнинг дастлабки етти учрашувида гол ура олмаган эди.

Шунингдек, “Тоттенҳэм” учун бу Англия футболининг энг юқори тўртта дивизионидаги мавсум стартида қайд этилган энг узоқ голсиз серия ҳисобланади.

Кейинги турда “шпорлар” 19 сентябрь куни ўз майдонида “Астон Вилла”ни қабул қилади.

“Тоттенҳэм” айни пайтда 2 очко билан Англия Премьер Лигаси турнир жадвалининг 17-поғонасидан жой олган.

“Шпорлар” ўтган мавсум якунларига кўра ҳам АПЛ турнир жадвалида 17-ўринни эгаллаган эди.