«Barselona» prezidenti Joan Laporta «Kamp Nou» stadionining 2028/29 yilgi Chempionlar ligasi finaliga mezbon sifatida tanlanganiga munosabat bildirdi.

«Bu «Barselona» va barcha muxlislar uchun ulkan faxr manbai. Bu tanlov, shuningdek, yangi «Kamp Nou»ning xalqaro miqyosda e’tirof etilganidan dalolat beradi. Stadion zamonaviy texnologiyalar, qulaylik, aloqa imkoniyatlari, ochiqlik va xizmat ko‘rsatish darajasi bo‘yicha jahon miqyosidagi arenalar qatorida o‘z o‘rnini mustahkamlamoqda.

UEFAning dunyo futbolidagi eng yirik voqealardan birini qabul qilish qobiliyatiga ishonch bildirishi ushbu loyihaning ko‘lami va ambisiyasini yana bir bor ko‘rsatadi. Bu «Kamp Nou»ni Barselonaning yangi ramzi va xalqaro miqyosdagi namunaviy stadionga aylantiradi.

Shuningdek, ushbu nomzodlikni qo‘llab-quvvatlagan Barselona shahar kengashi, Kataloniya hukumati va Ispaniya qirollik futbol federasiyasiga alohida minnatdorchilik bildirmoqchiman.

Bu biz birgalikda erishgan muhim qadam bo‘lib, Barselona shahri, Kataloniya va «Barselona» futbol klubini yanada kengroq jahon sahnasiga olib chiqadi», — dedi Laporta klub matbuot xizmatiga bergan intervyusida.