Kendri Paes nihoyat «Chelsi» libosida maydonga tushdi. Bu londonliklar u 16 yoshda bo‘lganida 17,27 million funtlik transfer bo‘yicha kelishuvga erishganidan uch yil o‘tib sodir bo‘ldi.

19 yoshli ekvadorlik futbolchi «Chelsi»ning 21 yoshgacha bo‘lgan jamoasi safida «Arsenal»ga qarshi o‘tkazilgan va 4:1 hisobidagi g‘alaba bilan yakunlangan uchrashuvda zaxiradan maydonga tushdi. Bu uning 2023 yilda «Independyente del Valye»dan transfer kelishuvi amalga oshirilganidan buyon «Chelsi» libosidagi ilk o‘yini bo‘ldi.

So‘nggi yillarda Paesning rivojlanish sur’ati sezilarli pasaydi. «Chelsi»ning yangi bosh murabbiyi Xabi Alonso uni o‘z rejalariga kiritmagan. Qolaversa, klub xalqaro ijara uchun belgilangan oltita o‘rinning barchasidan foydalanib bo‘lgani sababli, FIFA qoidalari Paesni xorijga ijaraga berish imkonini chekladi.

Futbolchining «Strasbur» va «River Pleyt»dagi avvalgi ijara davrlari ham kutilganidek kechmadi. BBC Sport ma’lumotiga ko‘ra, «River Pleyt»dagi manbalar Superklasikodagi omadsiz o‘yindan keyin uning munosabati va intizomi borasida xavotirlar bo‘lganini bildirgan.

«Independyente del Valye» egasi Mishel Deller Paes haqida shunday dedi:

«U yaxshi bola. U qiyin davrni boshdan kechirdi va hayotini yanada murakkablashtirgan ayrim qarorlar qabul qildi».

Shunga qaramay, Paes Ekvador terma jamoasi safida 27 ta uchrashuv o‘tkazgan va jahon chempionatida ham ishtirok etgan. «Chelsi»da esa hali ham sabr-toqat kelajakda o‘z samarasini berishi mumkin, degan ishonch bor.