«Bavariya» 2026 yilgi «Oltin to‘p» uchun kurashda Xarri Keynni qo‘llab-quvvatlash maqsadida klub ichida maxsus kampaniya boshladi.

Shu bilan birga, myunxenliklar sovringa nomzod bo‘lgan boshqa futbolchilari — Maykl Olise, Luis Dias va Dayo Upamekano borasida alohida bayonot bermagan.

Klubning rasmiy videosida Olise Keynni ochiq qo‘llab-quvvatladi.

«U o‘tgan mavsumning eng yaxshi futbolchisi edi», — dedi fransuz futbolchisi.

Yozua Kimmix, Serj Gnabri va Jonatan Ta ham Keynning jamoaga ta’siri faqat gollar bilan cheklanib qolmasligini ta’kidladi.

«Oltin to‘p»ga nomzod bo‘lgan yana bir «Bavariya» futbolchisi Luis Dias ham jamoadoshini yuqori baholadi.

«Unda hamma narsa bor. U gol uradi, assist qiladi, himoyada ham ishlaydi. U dunyodagi eng sermahsul futbolchilardan biri bo‘ldi va menimcha, bu sovrinni qo‘lga kiritishga mutlaqo loyiq.

U doimo yanada ko‘proq narsaga erishishni istaydigan, hech qachon qoniqmaydigan futbolchi. Jamoadosh sifatida sening ham o‘sishingga yordam beradi», — dedi Dias.

Keyn 2025/26 yilgi mavsumni Yevropa «Oltin butsa»si sohibi sifatida yakunladi.

«Bavariya» futbolchilari orasida so‘nggi bor Karl-Xayns Rummenigge 1981 yilda «Oltin to‘p»ni qo‘lga kiritgan.

2026 yilgi sovrin uchun nomzodlar orasida Lamin Yamal, Kilian Mbappe, Usmon Dembele va Lionel Messi ham bor. Taqdirlash marosimi 26 oktyabr kuni Londonda bo‘lib o‘tadi.