Venesuela terma jamoasi yarim himoyachisi Tomas Rinkon professional futboldagi faoliyatini yakunlaganini e’lon qildi.

"Ko‘p yillar davomida hayotimning bir qismi bo‘lgan bosqichni yakunlash vaqti keldi. Professional futbol bilan xayrlashish men uchun nimani anglatishini so‘z bilan ifodalash oson emas.

Bolaligimdan muvaffaqiyatga erishishni orzu qilardim, ammo bu yo‘l menga qanchalik ko‘p narsani his qilish va boshdan kechirish imkonini berishini hech qachon tasavvur qilmaganman.

Tug‘ilib o‘sgan yurtimni namoyon etish imkoniyatini hech qachon oddiy hol deb qabul qilmaganman. Maydonga har safar chiqqanimda bor kuchimni berganimni bilib, xotirjam ketyapman.

Bugun futbolchi sifatidagi bosqichim yakunlandi, ammo futbol bilan munosabatim emas. Buning iloji ham yo‘q", — dedi Rinkon.

Tomas Rinkon faoliyatini Venesuelada boshlagan, keyin esa besh yil davomida "Gamburg" safida o‘ynagan.

U Italiyada "Jenoa", "Yuventus", "Torino" va "Sampdoriya" klublari sharafini himoya qildi. Rinkon "Yuventus" bilan 2016/17 yilgi mavsumda Italiya chempionati va mamlakat kubogida g‘olib chiqqan.

Futbolchi faoliyatining so‘nggi bosqichini 2023–2026 yillarda "Santos"da o‘tkazdi va 2024 yilda Braziliya B Seriya musobaqasida chempion bo‘ldi.

38 yoshli Rinkon Venesuela terma jamoasi safida 134 ta o‘yin o‘tkazib, 1 ta gol urdi va 5 ta golli uzatma amalga oshirdi.