«Manchester Yunayted» bosh murabbiyi Maykl Kerrik Karlos Baleba yakshanba kuni «Fulxem»ga qarshi uchrashuvda maydonga tushish uchun qattiq harakat qilayotganini aytdi. Bu «MYU»ning yangi yarim himoyachisi uchun klub safidagi ilk o‘yin bo‘lishi mumkin.

«Manchester Yunayted» 22 yoshli Kamerun terma jamoasi futbolchisini avgust oyida «Brayton»dan sotib olgan edi. Biroq boldir qismidagi jarohat sabab Baleba hozirgacha qaydnomaga kiritilmadi.

U chorshanba kuni Angliya Liga kubogi doirasida sobiq klubi «Brayton»ga qarshi o‘yinni ham o‘tkazib yubordi. «Manchester Yunayted» o‘sha bahsda 2:0 hisobida oldinda bora turib, yakunda 2:3 hisobida mag‘lub bo‘ldi.

Kerrik MUTV'ga bergan intervyusida jamoadagi vaziyat yaxshilanganini ta’kidladi.

«Hozir deyarli hamma safda. So‘nggi bir hafta ichida ko‘pchilik futbolchilar o‘yin amaliyotiga ega bo‘ldi va sog‘lom holatga qaytdi. Endi Karlosni ham jamoaga qo‘shishga harakat qilyapmiz.

To‘g‘risini aytsam, uni qayta jamoaga qaytarish emas, balki birinchi marta to‘liq guruhga qo‘shish haqida gap ketyapti. U bu hafta biroz mashg‘ulot o‘tkazdi. Umid qilamanki, Lyuk Shou ham shu hafta jamoaga qayta qo‘shiladi va biz dam olish kunlaridagi o‘yinga kuchli tarkib bilan chiqamiz», — dedi Kerrik.

Balebaning kayfiyati haqida so‘ralganda, murabbiy shunday javob berdi:

«Ha, u o‘ynashni juda istayapti. U juda ko‘tarinki kayfiyatda.

Yangi klubga kelib, darhol jamoa bilan to‘liq mashg‘ulot o‘tkaza olmaslik oson emas. Ammo u bu vaziyatni juda yaxshi qabul qildi.

Uning xarakteri ajoyib, u juda g‘ayratli va imkoni boricha tezroq safga qaytish uchun qattiq harakat qilyapti. Uni yana jamoa bilan ko‘rish juda yaxshi».