«Venesiya» bosh murabbiyi Jovanni Stroppa jamoasining «Lasio»ga qarshi 0:2 hisobidagi mag‘lubiyatidan so‘ng fikr bildirdi. Uning ta’kidlashicha, chempionatdagi natijalar jamoaning amaldagi o‘yinini to‘liq aks ettirmayapti.

"Jadvaldagi o‘rnimiz jamoa ko‘rsatayotgan o‘yinni aks ettirmayapti. Statistikaga qarashning o‘zi kifoya: biz nishonga oltita aniq zarba berdik, «Lasio»da esa ikkita shunday zarba bo‘ldi. Shunga qaramay, 0:2 hisobida mag‘lub bo‘ldik. Birinchi bo‘lim juda yaxshi o‘tdi, futbolchilar rejani a’lo darajada bajarishdi.

Penalti uchrashuv taqdirini o‘zgartirishi mumkin edi, ammo undan foydalana olmadik. «Lasio» esa o‘z penaltisini golga aylantirdi. Shunga qaramay, jamoa ishonchini yo‘qotmadi, o‘yin nazoratini ham boy bermadi. Ammo baribir 0:2 hisobida yutqazdik.

Biz yaratgan imkoniyatlarni hisobga olsak, chempionatdagi o‘rnimiz butunlay boshqacha bo‘lishi mumkin edi. Muammo imkoniyat yarata olmayotganimizda emas. Eng muhimi, ulardan foydalanishimiz kerak", — dedi Stroppa Sky Sport Italia nashriga.