«Manchester Yunayted»ning yosh iste’dodi Jey Jey Gabriel uchun kurashda «Bavariya» yana faollashishi mumkin.

The Sun xabariga ko‘ra, futbolchining agenti Ali Barat 15 yoshli o‘yinchining kelajagi borasida Myunxen klubi va «Real» bilan muzokaralar o‘tkazishni rejalashtirmoqda.

Gabriel yaqinda «Manchester Yunayted»ni tark etish istagini ochiq bildirgan. Ma’lumotlarga ko‘ra, uning atrofidagilar ehtimoliy transferni amalga oshirish uchun Baratni vositachi sifatida tanlagan.

Manba ta’kidlashicha, «qizil iblislar» endi yosh futbolchining mashg‘ulotlarga qaytishi yoki klub safida yana maydonga tushishini kutmayapti.

«Bavariya» uchun Barat bilan muzokara o‘tkazish navbatdagi aniq qadam bo‘lishi mumkin. Klub sport direktori Kristof Froynd yaqinda Gabrielni «favqulodda iste’dod» deb atagan, biroq o‘sha paytda futbolchi tomoni bilan faol muloqot olib borilayotganini rad etgan edi.

Gabriel uchun raqobat yuqori bo‘lib qolmoqda. «Real» va «Bavariya»dan tashqari, u anchadan beri «Barselona» bilan ham bog‘lanib keladi. Shuningdek, «Pari Sen-Jermen» ham yosh futbolchining rivojlanishini kuzatib borayotgani aytilmoqda.