«Манчестер Юнайтед»нинг ёш истеъдоди Жей Жей Габриэл учун курашда «Бавария» яна фаоллашиши мумкин.

The Sun хабарига кўра, футболчининг агенти Али Барат 15 ёшли ўйинчининг келажаги борасида Мюнхен клуби ва «Реал» билан музокаралар ўтказишни режалаштирмоқда.

Габриэл яқинда «Манчестер Юнайтед»ни тарк этиш истагини очиқ билдирган. Маълумотларга кўра, унинг атрофидагилар эҳтимолий трансферни амалга ошириш учун Баратни воситачи сифатида танлаган.

Манба таъкидлашича, «қизил иблислар» энди ёш футболчининг машғулотларга қайтиши ёки клуб сафида яна майдонга тушишини кутмаяпти.

«Бавария» учун Барат билан музокара ўтказиш навбатдаги аниқ қадам бўлиши мумкин. Клуб спорт директори Кристоф Фройнд яқинда Габриэлни «фавқулодда истеъдод» деб атаган, бироқ ўша пайтда футболчи томони билан фаол мулоқот олиб борилаётганини рад этган эди.

Габриэль учун рақобат юқори бўлиб қолмоқда. «Реал» ва «Бавария»дан ташқари, у анчадан бери «Барселона» билан ҳам боғланиб келади. Шунингдек, «Пари Сен-Жермен» ҳам ёш футболчининг ривожланишини кузатиб бораётгани айтилмоқда.