Braziliyaning ikki yuqori divizionida ishtirok etuvchi klublar dushanba kuni o‘tkazilgan ovoz berishda Braziliya futbol konfederasiyasining (CBF) o‘yin qaydnomasidagi xorijlik futbolchilar sonini qisqartirish bo‘yicha taklifini ma’qulladi. Bu haqda Globo xabar berdi.

Ayni paytda klublar bir uchrashuv qaydnomasiga 9 nafar xorijlik futbolchini kiritishi mumkin. 2027 yildan bu limit 8 nafarga tushiriladi, 2030 yilga kelib esa 5 nafargacha qisqartiriladi.

Taklifga faqat «Baiya» va «Flamengo» klublari qarshi ovoz bergan.

Shuningdek, yosh futbolchilarni tayyorlash va ularga ko‘proq imkoniyat berish maqsadida jamoalar qaydnomasi bo‘yicha qoidalarga ham o‘zgartirish kiritish ma’qullandi.

2027 yildan klublar chempionat uchun 50 nafargacha futbolchini ro‘yxatdan o‘tkazishi mumkin bo‘ladi. Ularning kamida 20 nafari 23 yoshdan katta bo‘lmasligi shart. 2030 yilga borib esa bu ko‘rsatkichni 25 nafarga yetkazish rejalashtirilgan.

Braziliya chempionati futbolchilarining o‘rtacha yoshi 28,5 ni tashkil etadi. CBF ta’kidlashicha, so‘nggi yillarda yosh braziliyalik futbolchilar uchun imkoniyatlar kamayib bormoqda. Bu asosan ko‘proq tajribaga ega xorijlik o‘yinchilarning kelishi va ularning yosh futbolchilar o‘rniga ko‘proq o‘yin amaliyotiga ega bo‘lishi bilan bog‘liq.