«Bornmut»ning sobiq himoyachisi Charli Deniyels «Fulxem»ning 21 yoshgacha bo‘lganlar jamoasiga yangi bosh murabbiy etib tayinlandi.

40 yoshli mutaxassis dushanba kuni ilk mashg‘ulotini o‘tkazdi. U seshanba kuni EFL Trophy musobaqasi doirasida «Lester Siti»ga qarshi safar uchrashuvida jamoani boshqaradi.

Deniyels «Fulxem»ning yosh futbolchilari bilan ishlashni va ularni katta futbolga tayyorlashda yordam berishni intiqlik bilan kutayotganini bildirdi.

U futbolchilik faoliyatini «Norvich Siti» va «Tottenxem» yoshlar tizimida boshlagan. Keyinchalik «Chesterfild», «Leyton Oriyent», «Jillingem», «Shrusberi», «Portsmut» va «Kolchester Yunayted» klublarida ham to‘p surgan.

Deniyels futbolchilik faoliyatining asosiy qismini «Bornmut»da o‘tkazdi. U klub safida 200 dan ortiq uchrashuvda maydonga tushdi va 2014/15 yilgi mavsumda jamoaning o‘z tarixida ilk bor Premyer-ligaga chiqishiga hissa qo‘shdi.

Futbolchilik faoliyatini yakunlaganidan so‘ng Deniyels murabbiylikka o‘tdi va «Uotford»ning yoshlar tizimida ishladi. Keyinchalik u asosiy jamoa murabbiylar shtabiga qo‘shildi va o‘tgan mavsumda vaqtinchalik bosh murabbiy vazifasini ham bajardi.