«Chelsi» sobiq darvozaboni Eduar Mendi Senegal bilan Afrika kubogini yutishni faoliyatidagi eng yaxshi lahza deb atadi.
Mendi 2022 yilda Senegal tarkibida mamlakat tarixida ilk bor Afrika kubogini qo‘lga kiritgan. O‘sha voqeadan taxminan sakkiz oy avval u «Chelsi» bilan Chempionlar ligasi finalida «Manchester Siti»ni mag‘lub etgan edi.
Biroq darvozabonning fikricha, bu ikki yutuqni solishtirib bo‘lmaydi.
«Afrika kubogini yutish faoliyatimdagi eng yaxshi lahza edi. Bu Chempionlar ligasini yutishdan 10 barobar yaxshiroq bo‘lgan.
Hozir buni bemalol solishtira olaman, chunki Osiyo Chempionlar ligasini ham ikki marta yutdim.
Klub bilan sovrin yutish — ajoyib his. Ammo terma jamoa bilan, ayniqsa, mamlakat avval hech qachon bunday sovrinni qo‘lga kiritmagan bo‘lsa, buni solishtirib bo‘lmaydi.
Bunday voqea hayotingda bir marta sodir bo‘ladi. Tarix yaratgan jamoaning bir qismi bo‘lish men uchun ajoyib edi», — dedi Mendi.
