Didye Desham murabbiylik faoliyatiga qaytishga shoshilmayapti va katta ehtimol bilan ta’tilini uzaytiradi. Bu haqda "L'Equipe" xabar berdi.
Desham 2026 yilgi Jahon chempionatidan so‘ng shartnomasi yakuniga yetgach, Fransiya terma jamoasi bosh murabbiyi lavozimini tark etdi. Shu tariqa uning "uch ranglilar" bilan 14 yillik faoliyati yakunlandi. Uning o‘rnini Zinedin Zidan egalladi.
Manbaga ko‘ra, 57 yoshli mutaxassis hozir Monako chegarasidagi Kap-d'Ayda joylashgan asosiy uyi va Bretandagi ikkinchi qarorgohi o‘rtasida dam olmoqda.
Desham eng erta holatda noyabr oyida murabbiylikka qaytishi kutilmoqda. U avvalroq har qanday taklifni, jumladan, boshqa milliy terma jamoani boshqarish variantini ham ko‘rib chiqishini aytgan edi.
