Дидье Дешам мураббийлик фаолиятига қайтишга шошилмаяпти ва катта эҳтимол билан таътилини узайтиради. Бу ҳақда "L'Equipe" хабар берди.
Дешам 2026 йилги Жаҳон чемпионатидан сўнг шартномаси якунига етгач, Франция терма жамоаси бош мураббийи лавозимини тарк этди. Шу тариқа унинг "уч ранглилар" билан 14 йиллик фаолияти якунланди. Унинг ўрнини Зинедин Зидан эгаллади.
Манбага кўра, 57 ёшли мутахассис ҳозир Монако чегарасидаги Кап-д'Айда жойлашган асосий уйи ва Бретандаги иккинчи қароргоҳи ўртасида дам олмоқда.
Дешам энг эрта ҳолатда ноябрь ойида мураббийликка қайтиши кутилмоқда. У аввалроқ ҳар қандай таклифни, жумладан, бошқа миллий терма жамоани бошқариш вариантини ҳам кўриб чиқишини айтган эди.
