"Napoli" prezidenti Aurelio De Laurentis "Milan" egasi Jerri Kardinale hamda Italiya klublariga sarmoya kiritayotgan investisiya fondlarini tanqid qildi.

"Uch yil avval Jerri Kardinaleni kechki ovqatga taklif qilgan edim. U mening nazarimda hech qanday mantiqqa ega bo‘lmagan gaplarni aytdi. U haqiqiy tadbirkor emas, moliyachi kabi fikrlaydigan klub egasi edi", – dedi De Laurentis.

Funksioner biznesda o‘zi boshqacha yondashuvga amal qilishini ta’kidladi. U g‘oyani tanlashdan tortib, uni moliyalashtirish, ishlab chiqarish va mahsulotni targ‘ib qilishgacha bo‘lgan barcha jarayonlarni shaxsan nazorat qilishni ma’qul ko‘radi.

Shundan so‘ng De Laurentis investisiya fondlarining ishlash modelini ham tanqid qildi.

"Kardinale va fondlar o‘z investorlariga daromad olib kelish uchun pul kiritdi. Agar ma’lum vaqt o‘tib, ular foyda ko‘rmagan bo‘lsa, unda ular qanday naf keltirdi? Hech qanday", – dedi u.

De Laurentis, shuningdek, Avstraliya va Singapurda ikkita o‘yin o‘tkazish uchun taklif qilingan 6 million dollardan voz kechganini aytdi. U mavsumoldi tayyorgarlik paytida 30 soatlik parvozni o‘z ichiga olgan safarni maqbul deb hisoblamagan.