"Наполи" президенти Аурелио Де Лаурентис "Милан" эгаси Жерри Кардинале ҳамда Италия клубларига сармоя киритаётган инвестиция фондларини танқид қилди.

"Уч йил аввал Жерри Кардиналени кечки овқатга таклиф қилган эдим. У менинг назаримда ҳеч қандай мантиққа эга бўлмаган гапларни айтди. У ҳақиқий тадбиркор эмас, молиячи каби фикрлайдиган клуб эгаси эди", – деди Де Лаурентис.

Функционер бизнесда ўзи бошқача ёндашувга амал қилишини таъкидлади. У ғояни танлашдан тортиб, уни молиялаштириш, ишлаб чиқариш ва маҳсулотни тарғиб қилишгача бўлган барча жараёнларни шахсан назорат қилишни маъқул кўради.

Шундан сўнг Де Лаурентис инвестиция фондларининг ишлаш моделини ҳам танқид қилди.

"Кардинале ва фондлар ўз инвесторларига даромад олиб келиш учун пул киритди. Агар маълум вақт ўтиб, улар фойда кўрмаган бўлса, унда улар қандай наф келтирди? Ҳеч қандай", – деди у.

Де Лаурентис, шунингдек, Австралия ва Сингапурда иккита ўйин ўтказиш учун таклиф қилинган 6 миллион доллардан воз кечганини айтди. У мавсумолди тайёргарлик пайтида 30 соатлик парвозни ўз ичига олган сафарни мақбул деб ҳисобламаган.