"Arsenal" va Fransiya terma jamoasining sobiq hujumchisi Tyerri Anri "Manchester Siti" eng qattiq jazoga loyiq, deb hisoblaydi.
"Siti" Premyer-liga tomonidan qo‘yilgan 115 ta ayblovning 114 tasi bo‘yicha aybdor deb topilgani aytilmoqda. Gap 2009–2018 yillar oralig‘idagi qoidabuzarliklar haqida ketmoqda. Shu davrda jamoa uch marta Angliya chempioni bo‘lgan.
"Ochig‘ini aytsam, agar "Manchester Siti" 114 ta band bo‘yicha aybdor bo‘lsa, faqat ochkolarni olib tashlash qanday qilib yetarli bo‘lishi mumkinligini tushunmayman.
Agar bu qoidabuzarliklar klubga ustunlik bergan bo‘lsa, o‘sha davrda qo‘lga kiritilgan chempionliklar bekor qilinishi kerak. Ular sovrinlaridan mahrum etilishi, rekordlar esa qayta yozilishi lozim. Quyi ligaga tushirish variantini ham ko‘rib chiqish kerak.
Bu gap "Manchester Siti"ning o‘zi haqida emas, adolat haqida. Agar shuncha qoidani buzib, aybingiz isbotlansa, barcha qo‘lga kiritilgan sovrinlarni saqlab qolib, faqat ochko yo‘qotish bilan qutulib ketish mumkin emas. Aks holda boshqa klublarga qanday signal beramiz?" — dedi Anri.
"Manchester Siti" qaror ustidan apellyasiya berish niyatida. Klub rasmiy qaror e’lon qilinganidan keyin 14 kun ichida shikoyat qilishi mumkin.
