Niderlandiya terma jamoasi bosh murabbiyi Xavi Millatlar ligasi 2-turida Serbiya ustidan qozonilgan g‘alaba haqida fikr bildirdi.

Uchrashuv 27 sentyabr kuni Belgraddagi «Rayko Mitich» stadionida bo‘lib o‘tdi va Niderlandiyaning 2:1 hisobidagi g‘alabasi bilan yakunlandi. Bu Niderlandiyaning Xavi qo‘l ostidagi ilk g‘alabasi bo‘ldi.

«Yuqori pressingda, o‘rta blokda va himoya chizig‘ida yaxshiroq harakat qilishimiz mumkin edi. Ammo, menimcha, g‘alabaga munosib edik.

Men jamoam 90 daqiqa davomida to‘pga egalik qilishi va pressing qo‘llashini xohlayman. Balki buning uchun mentalitetni o‘zgartirish kerak bo‘lar, ammo men aynan shunday futbol o‘ynashimizni istayman.

Serbiya individual jihatdan kuchli jamoa. Tadich, Yovich va Kostich maydonga tushgach, o‘yin o‘zgardi. Shunga qaramay, g‘alabaga munosib bo‘lganimizni his qildim», — deya Xavining so‘zlarini UEFA matbuot xizmati keltirdi.

Millatlar ligasining 1-turida Niderlandiya Germaniya bilan 1:1 hisobida durang o‘ynagan edi. Niderlandiyaliklar turnirdagi navbatdagi uchrashuvini 1 oktyabr kuni Gresiyaga qarshi o‘tkazadi.