Ispaniya terma jamoasi mag‘lubiyatsiz o‘yinlar seriyasini 40 taga yetkazib, jahon rekordini yangiladi. Jamoa Millatlar ligasi «A» ligasi guruh bosqichi 2-turida Xorvatiyani 4:1 hisobida mag‘lub etdi. Uchrashuv Sevilyadagi «Ramon Sanches Pisxuan» stadionida bo‘lib o‘tdi.
Ispaniyaning asosiy vaqtdagi so‘nggi mag‘lubiyati 2024 yil mart oyida Kolumbiyaga qarshi o‘rtoqlik uchrashuvida qayd etilgan — 0:1.
Rasmiy o‘yinlarda esa «Qizil furiya»ning asosiy vaqtdagi so‘nggi mag‘lubiyati 2023 yil mart oyiga to‘g‘ri keladi. O‘shanda Yevropa chempionati — 2024 saralash bosqichi «A» guruhining 2-turida Luis de la Fuente shogirdlari Shotlandiyaga 0:2 hisobida mag‘lub bo‘lgan.
Shu tariqa ispaniyaliklar ketma-ket mag‘lubiyatsiz o‘tkazilgan rasmiy uchrashuvlar bo‘yicha o‘zlariga tegishli rekordni yangiladi. Ular ushbu natijani o‘tgan yozda Jahon chempionati finalida qayd etilgan 38 ta o‘yinlik seriyadan keyin o‘rnatgan edi.
Bunga qadar rekord Italiya terma jamoasiga tegishli bo‘lgan. Italiyaliklar 2018 yil sentyabridan 2021 yil oktyabriga qadar 37 ta uchrashuvda mag‘lubiyatga uchramagan.
Qayd etish joiz, 2025 yilgi Millatlar ligasi finalida Ispaniyaning Portugaliyaga qarshi mag‘lubiyati mazkur hisob-kitobga kiritilmagan. Ispaniya o‘sha uchrashuvning asosiy vaqtida 2:2 hisobida durang o‘ynagan va penaltilar seriyasida 3:5 hisobida mag‘lub bo‘lgan.
