Yaqinda matbuotda Ferran Torres Pedrini o‘z yo‘lidan borib, «Barselona»dan «PSJ»ga o‘tishga ko‘ndirishga harakat qilayotgani haqida xabarlar tarqalgan edi. Endi El Nacional Torres kataloniyaliklarning yana bir futbolchisi — Dani Olmoni ham Parij klubida ko‘rishni istayotganini ma’lum qildi.

«Luis Enrike Nosir Al-Xelayfiyga ushbu transfer imkoniyatini ko‘rib chiqishni hech ikkilanmay tavsiya qilgan, Ferran esa vositachi vazifasini bajarmoqda. Ular Ispaniya terma jamoasi qarorgohida birga ekanidan foydalanib, Torres Olmoga bu g‘oyani allaqachon taklif qilgani aytilmoqda», — deyiladi xabarda.

Manbaga ko‘ra, Dani Olmoni transfer haqida o‘ylashga undashi mumkin bo‘lgan asosiy omillardan biri — uning ayni paytda «Barselona»ning asosiy tarkibidagi o‘rni kafolatlanmaganidir.

Shuningdek, 28 yoshli futbolchiga «Bavariya» va Angliya Premyer-ligasining bir qator klublari ham qiziqish bildirmoqda.

Transfermarkt portali Dani Olmoning transfer qiymatini 60 million yevroga baholamoqda.