Ispaniya terma jamoasi bosh murabbiyi Luis de la Fuente Millatlar ligasida Chexiya ustidan 3:1 hisobida qozonilgan g‘alabadan so‘ng Lamin Yamalning o‘yiniga yuqori baho berdi.

19 yoshli vinger yakshanba kungi uchrashuvda hisobni ochdi. U 6-daqiqada raqib darvozasini ishg‘ol qildi. «Qizil furiya» ustozi «Barselona» yulduzining uzoq masofadan yo‘llagan chiroyli zarbasidan shu qadar ta’sirlandiki, goldan so‘ng boshini ushlab qoldi. Matbuot anjumanida esa futbolchiga maqtovlarini ayamadi.

«Yamalda futbolning haqiqiy afsonasiga aylanish uchun barcha narsa bor. Bu — mening fikrim. Agar «Oltin to‘p»ga da’vogar bo‘lgan yagona ispaniyalik futbolchi u bo‘lganida, uni hammadan yaxshiroq deb aytgan bo‘lardim. Ammo sovringa boshqa ispaniyalik futbolchilar ham nomzod va men ularni hurmat qilaman», — deya de la Fuentening so‘zlarini jurnalist Fabrisio Romano keltirdi.

6 oktyabr kuni amaldagi jahon chempionlari ushbu yig‘indagi so‘nggi uchrashuvini safarda Xorvatiyaga qarshi o‘tkazadi.