«Komo» markaziy himoyachisi Xakobo Ramon «Chelsi»ning ehtimoliy transfer nishonlari qatorida qolmoqda.

21 yoshli futbolchiga Yevropaning yirik klublari tomonidan qiziqish tobora ortib bormoqda. Asosiy da’vogarlardan biri «Chelsi» hisoblanadi. Insayder Ekrem Konur ma’lumotiga ko‘ra, «ko‘klar» Italiyada Sesk Fabregas qo‘l ostida o‘zini ko‘rsata olgan istiqbolli ispaniyalik himoyachini jiddiy ravishda nishonga olgan.

Futbolchining o‘zi esa «Komo»da baxtli va klubni tark etishga shoshilmayapti.

Xakobo Ramonning Madridning «Real» klubiga qaytishi ehtimoli ham tilga olinmoqda. Eslatib o‘tamiz, «qaymoqranglilar» o‘z tarbiyalanuvchisini qayta sotib olish bo‘yicha imtiyozli huquq bandi tufayli uni ancha arzon narxga qaytarishi mumkin.

Transfermarkt portali markaziy himoyachining bozor qiymatini 45 million yevroga baholamoqda.