Taniqli braziliyalik futbolchi Neymar yaqin vaqt ichida Argentina terma jamoasi safidagi xayrlashuv uchrashuvini o‘tkazadigan, "Barselona" va "PSJ"dagi sobiq jamoadoshi Lionel Messiga murojaat qildi.
"Futbolni sevadigan har bir inson shu yillar davomida sening o‘yiningdan zavq oldi... Bugun sening milliy terma jamoang, o‘z yurting libosidagi so‘nggi o‘yining. Umid qilamanki, har bir soniyadan zavq olasan va bugun senga ko‘rsatiladigan barcha hurmat-ehtirom seni baxtli qiladi.
Senga faqat Argentina emas, futbol uchun qilgan barcha ishlaring tufayli butun dunyo minnatdor.
Futbolni yanada ko‘proq sevishimga sabab bo‘lganing uchun rahmat. Senga qarshi o‘ynash va sen bilan birga tarix yaratish men uchun katta sharaf edi", — deb yozdi Neymar.
39 yoshli Messi Benin terma jamoasiga qarshi o‘rtoqlik uchrashuvida maydonga tushadi. Bu bahs uning Argentina milliy terma jamoasi libosidagi so‘nggi o‘yini bo‘ladi.
Uchrashuv 7 oktyabrga o‘tar kechasi bo‘lib o‘tadi. Bosh hakamning start hushtagi Toshkent vaqti bilan soat 04:00 da chalinadi.
